Dr Ferdinand Isch Gstorbe

Dr Ferdinand isch gstorbe ojeh ojeh ojeh
dr Ferdinand isch gstorbe es tuet mer hütt no weh
är wo so vil het gworbe um Liebi im Quartier
dr Ferdinand isch gstorbe das arme Tier

Wien i doch geng mys Goudi am Ferdinand ha gha
e sone stouze Moudi wird nie meh öpper ha
geng d’Liebi het ne tribe nie ds Müüs- und Vögelfah
är isch mys Vorbild blibe dä Chatzema

Wen är sys unbeschwärte ganze Läbbe lang
het gsungen i de Gärte und nüt als Minnegsang
de ischs im albe glunge ds Härz z’rüere vo sym Schatz
är het für d’Chatze gsunge doch nid für d’Chatz

So het är ou am gröschte Nachwuchs ds Läbbe gschänkt
das tuet eim aube tröschte wo a sys Stärbe dänkt
e huufe Ferdinändli spaziere no dür d’Stedt
sit das ne dr Herr Brändli erschlage het

Die Lüt me sött se strafe verschliesse ds Härz dr Kunscht
si wei geng nume schlafe und hei ke sinn für d’Brunscht
so het ou dr Herr Brändli mit emne Topf für d’Nacht
däm arme Ferdinändli es Ändi gmacht

Dr Ferdinand isch gstorbe ojeh ojeh ojeh
dr Ferdinand isch gstorbe es tuet mer hütt no weh
är wo so vil het gworbe um Liebi im Quartier
dr Ferdinand isch gstorbe das arme Tier

Kommentieren

Sie müssen angemeldet sein, um kommentieren zu können.

chinderliedli.ch bietet Eltern und Kindern Liedertexte, Melodien, Videos, Buch- und CD-Tipps zum Mitsingen. Zusätzlich informiert chinderliedli.ch in diesem Zusammenhang über Veranstaltungen und Kurse.

www.spielmeer.ch