Verse

Mir stönd jetz wieder im Advent!

Mir stönd jetz wieder im Advent!
E heimlichi liebi Zit,
trotz grossem Lärm und vielem Gschrei
wo’i der Wält ussi git.

S wird doch i mänger Stube schön,
mängs Härzli strengt sich a
und sinnet, wie’s ein Nebedmönsch
es Freudli mache cha.

Me steckt die erschte Liechtli uf,
und i däm Sillberschy
erwached d Wiehnachtshoffnig schnäll
für alli – gross und chli.

Advent, du liebi, stilli Zit
mit Tannegrün im Chranz,
zünd a i mängem Härz und Aug
en stille Wiehnachtsglanz!

Riite, riite Rössli

Riite, riite Rössli
z’Bade stoht es Schlössli
z’Basel stoht es goldigs Huus
lueged drei Mareie druus.
Die erschti die spinnt Siide,
die zweiti schnätzlet Chriide
die dritti die spinnt Haberstrau
Bhüet mer Gott mis Schätzeli au.

Samichlaus, du liebe Maa (2)

Samichlaus du liebe Maa,
gäll du wotsch es Sprüchli ha.
Samichlaus ich säg dir eis,
Ich weiss e keiss.

Samichlaus, du liebe Maa (1)

Samichlaus, du liebe Maa,
mues ich jetzt go füre staa?
Gäll du bisch nöd bös mit mir,
weisch ich han chli Angscht vor dir.
Gfolget hani scho nöd immer,
s’git no Sache diä sind schlimmer!

Samichlaus du guete Maa

Samichlaus du guete Maa
ändlich bisch du wieder da.
Chunsch cho luege was ich mache
wie n ich spiele, singe und lache.
Tuesch mich lehre s‘ Härz verschänke
au e chli a di andere dänke.
Nur so bin ich sälber froh
s‘ Christchind cha zue mer cho.

Samichlaus wie bin-i froh

Samichlaus wie bin-i froh,
dass du au zu mir bisch cho,
dass du mir mit guete Sache
ganz e grossi Freud willsch mache.
Mit em «Folge» weiss i scho
dörftis mängsmol no besser goh.
Weisch i ha halt s Händli wäsche
öppe scho emol vergässe!

Hüte sind sie suber! Lueg!
Samichlaus, gäll gisch mir gnueg
Guetzli, Nuss und Mandelchärn,
weisch, denn ha di richtig gärn

Samichlaus ich bi so froh

Samichlaus, ich bi so froh,
dass du hüt zu mir bisch cho,
du weisch, ich tue gern Nüssli ässe,
hesch mis Säckli nöd vergässe?

Samichlaus wo chunsch du här?

Samichlaus, wo chunsch du här?
Siebehundert Stund wiit här!
Samichlaus, isch s’Seckli schwär?
Siebehundert Pfund isch’s schwär!
Samichlaus, mach’s schnäll läär!
Denn isch s’Seckli nümme schwär!

chinderliedli.ch bietet Eltern und Kindern Liedertexte, Melodien, Videos, Buch- und CD-Tipps zum Mitsingen. Zusätzlich informiert chinderliedli.ch in diesem Zusammenhang über Veranstaltungen und Kurse.

www.spielmeer.ch