Artikel-Schlagworte: „Basel“

Uff dr Fääri

Wil i hüt Geburdsdaag ha,
faar i uf em Rhy
D’Fääri isch jo gar nid düür,
fröölig stig i ii.

Für zwölf Batze hi und zrugg,
isch e Gschängli joo
himmelhoch isch d’Wettstaibrugg
Fäärimaa blib stoo

doch si Schiffli macht kai Raschd
s’Rad am Saili rollt
s’Münschder ragt in d’Wolge faschd
d’Wolge sin wie Gold.

d’Wälle sprütze d’Fääri aa
oo, wie ruschd dr Rhy
wott bis nach Amerika
in däm Schiffli sii.

dr Fäärimaa

1. Am Rhy dört stoot e Schlabbe
was foot me mit däm aa?
es hogt e Männli dinne:
Es isch dr Fäärimaa!

Refrain:
Hösch Fäärimaa,
hösch Fäärimaa,
hösch di wöt y sii!
Hösch Fäärimaa,
hösch Fäärimaa,
hösch dr Rhy isch dii!

2. Är faart dört mit sim Schiffli
dr ganz Daag hi und här
und dänggt by dere Arbet:
„Das isch jo gar nit schwär!“

Refrain:

3. Und wenn am andere Ufer
die alti Glogge schält,
do wird dr schweeri schwängel
uff die andri Site gheit.

Refrain:

4. Und sin die Lütt denn ändlig
in Schlappe iine kho,
do wird die langi Stange
uff die andri Site do.

Refrain:

5. Zerschd rysst är s’Rueder umme
und denn au d’Lyt no ab.
Die maischte gnyble willig
dr Stutz denn-usem Sagg

Refrain:

6. Und wot mol ain nid zaale,
so schloot är gar kai Krach.
Är paggt en schnäll am Kraage
und dunggt en kurz in Bach!

Refrain:

7. Kasch barfuess au uff d’Fääri,
bym Leu do fallsch kuum uff!
Dört faart e „Doppelmeter“
dä wird bestimmt nit muff!

Refrain:

8. Das Liedli isch jetzt fertig;
dr Fäärimaa goot haim.
Är schliesst sy alte Schlappe
dr Pulver nimmt er haim.

Refrain:

Kumm, mer faare-n ybere Rhy

Kumm, mer faare-n ybere Rhy
:mit em Fährimaa:
Gib mer d’Hand, jetz stygemer y
:muesch e Batze ha:
Lueg, wie’s Wasser zieht
unter dr mittlere Brugg
gluggst, es ruschd,es wird nid mied,
will furt und lost nid lugg.

Lueg mer dert my Minschder a,
:hoch und dunggelroot:
Lueg wie d’Pfalz dert vornedra
:uf em Felse stoot:
Lueg, bim Klingetaal
stoot doch dr Vogel Gryff
s’isch nyt, s’isch nur e Sunnestraal
und d’Wälle schleen ans Schiff.

Los der Rhy singt lys sy Lied
:wie vor Dausig Joor:
wenn äär an uns duurezieht
:los und spitz di Oor:
gäll i see dr’s aa,
dir gfallt er au dä Gsang
jetzt sin mer do, nimm Fäärimaa
my Batze und mi Dangg.

chinderliedli.ch bietet Eltern und Kindern Liedertexte, Melodien, Videos, Buch- und CD-Tipps zum Mitsingen. Zusätzlich informiert chinderliedli.ch in diesem Zusammenhang über Veranstaltungen und Kurse.

www.spielmeer.ch