Artikel-Schlagworte: „Mani Matter“

Dr Sidi Abdel Assar vo El Hama

dr sidi abdel assar vo el hama
het mal am morge früe no im pijama
ir strass vor dr moschee
zwöi schöni ouge gseh
das isch dr afang worde vo sim drama
s isch d tochter gsy vom mohamed mustafa
dr abdel assar het nümm chönne schlafa
bis är bim mohamed
um d hand aghalte het
und gseit: i biete hundertfüfzig schaf a
dr mohamed het gantwortet: bi allah
es fröit mi, dass my tochter dir het gfalla
doch wärt isch si, my seel
zwöihundertzwänzg kamel
und drunder chan i dir sen uf ke fall la
da het dr abdel assar gseit: o sidi
uf sone tüüre handel gang i nid y
isch furt, het gly druf scho
ä billigeri gno
wo nid so schön isch gsy, drfür ä gschydi
doch wenn es nacht wird über dr sahara
luegt är dr mond am himmel häll und klar a
und truuret hie und da
de schönän ouge na
und dänkt: hätt i doch früecher afa spara

(Mani Matter)

Dr sidi Abdel Assar vo el Hama - Ir Ysebahn

So klingt Dr Sidi Abdel Assar vo El Hama heute: Guillermo Sorya interpretiert das Stück „Dr Sidi Abdel Assar vo El Hama“ mit Soul und Groove.

Dr Eskimo

Kennet dir das Gschichtli scho
vo dem armen Eskimo
wo in Grönland einisch so
truurig isch um ds Läbe cho.

Er het dank em Radio
Fröid ar Musig obercho
und het tänkt das chan i o
so isch er i ds Unglück cho.

Nämlech är het sech für zwo
Fläsche Labertran es no
Guet erhaltnigs Cembalo
gchouft und hets i d’Höhli gno.

Doch won är fortissimo
gspilt het uf sym Cembalo
isch en Ysbär ynecho
het ne zwüsche d’Chralle gno.

Kunscht isch geng es Risiko
So isch ar um ds Läbe cho
und dir gseht d’Moral dervo
choufet nie es Cembalo
süsch geits euch grad äbeso
i däm armen Eskimo
wo in Grönland einisch so
truurig isch um ds Läbe cho.

I Han Es Zündhölzli Azündt

I han es Zündhölzli azündt
und das het e Flamme gäh
und i ha für d’Zigarette
welle Füür vom Hölzli näh
aber ds Hölzli isch dervo-
gspickt und uf e Teppich cho
und es hätt no fasch es Loch i Teppich gäh dervo

Ja me weis was cha passiere
we me nid ufpasst mit Füür
und für d’Gluet ar Zigarette
isch e Teppich doch de z’tüür
und vom Teppich hätt o grus
chönne ds Füür i ds ganze Hus
und wär weis, was da nid alles no wär worde drus

S’hätt e brand gäh im Quartier
und s’hätti d’Füürwehr müesse cho
hätti ghornet i de Strasse
und dr Schluuch vom Wage gno
und sie hätte Wasser gsprützt
und das hätt de glych nüt gnützt
und die ganzi Stadt hätt brönnt, es hätt se nüt meh gschützt

Und d’Lüt wären umegsprunge
i dr Angscht um Hab und Guet
hätte gmeint s’heig eine Füür gleit
hätte ds Sturmgwehr gno ir Wuet
alls hätt brüelet: wär isch tschuld?
ds ganze Land i eim Tumult
dass me gschosse hätt uf d’Bundesrät am Rednerpult

D’UNO hätt interveniert
und d’UNO-Gägner sofort o
für ir Schwyz dr Fride z’rette
wäre beid mit Panzer cho
s’hätt sech usdehnt nadisna
uf Europa, Afrika
s’hätt e Wältchrieg gäh und d’Mönschheit wär jitz nümme da

i han es Zündhölzli azündt
und das het e Flamme gäh
und i ha für d’Zigarette
welle Füür vom Hölzli näh
aber ds Hölzli isch dervo-
gspickt und uf e Teppich cho –
gottseidank dass i’s vom Teppich wider furt ha gno

Dr Ferdinand Isch Gstorbe

Dr Ferdinand isch gstorbe ojeh ojeh ojeh
dr Ferdinand isch gstorbe es tuet mer hütt no weh
är wo so vil het gworbe um Liebi im Quartier
dr Ferdinand isch gstorbe das arme Tier

Wien i doch geng mys Goudi am Ferdinand ha gha
e sone stouze Moudi wird nie meh öpper ha
geng d’Liebi het ne tribe nie ds Müüs- und Vögelfah
är isch mys Vorbild blibe dä Chatzema

Wen är sys unbeschwärte ganze Läbbe lang
het gsungen i de Gärte und nüt als Minnegsang
de ischs im albe glunge ds Härz z’rüere vo sym Schatz
är het für d’Chatze gsunge doch nid für d’Chatz

So het är ou am gröschte Nachwuchs ds Läbbe gschänkt
das tuet eim aube tröschte wo a sys Stärbe dänkt
e huufe Ferdinändli spaziere no dür d’Stedt
sit das ne dr Herr Brändli erschlage het

Die Lüt me sött se strafe verschliesse ds Härz dr Kunscht
si wei geng nume schlafe und hei ke sinn für d’Brunscht
so het ou dr Herr Brändli mit emne Topf für d’Nacht
däm arme Ferdinändli es Ändi gmacht

Dr Ferdinand isch gstorbe ojeh ojeh ojeh
dr Ferdinand isch gstorbe es tuet mer hütt no weh
är wo so vil het gworbe um Liebi im Quartier
dr Ferdinand isch gstorbe das arme Tier

chinderliedli.ch bietet Eltern und Kindern Liedertexte, Melodien, Videos, Buch- und CD-Tipps zum Mitsingen. Zusätzlich informiert chinderliedli.ch in diesem Zusammenhang über Veranstaltungen und Kurse.

www.spielmeer.ch