Artikel-Schlagworte: „Samichlaus“

Es Liechtli brännt im Tannewald

Es Liechtli brännt im Tannewald
Was söll äch das bedüte?
Chunnt ächt de Samichlaus scho bald?
Ich ghöre äs Glöggli lüüte.

Es isch de Chlaus mit schwärem Schritt
Chömed lueged gschwind
Er träit en Sack voll Nüssli mit
Für alli, alli Chind

Samichlaus ich hett en Wunsch

Samichlaus ich hett en Wunsch:
Wänn du dänn zu öis hei chunnsch
wett ich mit dir use gah
und e chli zum Esel schtah
wett sin Chopf i’d Arme näh
und em e chli z’Ässe gäh

Samichlaus, lueg uf em Tisch

Samichlaus, lueg uf em Tisch
s chliine Cherzli, wo det isch,
lüüchtet nume wäge dier.

Du und ich und alli mier
freuid üs, dass Chlausziit isch.
Und s chlii Cherzli uf em Tisch
seid, as ganz glii Wienacht isch.

Fi, fa, fo – de Samichlaus isch do

Fi, fa, fo – de Samichlaus isch do!
Zeig emol di schöne Sache,
wo d im Wald häsch chönne mache!
Nüss und Bire han i gärn,
Öpfel und au Zimmetschtärn,
gfolget han i zwar nöd immer:
aber, Samichlaus, bitte gimmer
trotzdem vo de guete Sache
und dänn gsehsch mi härzli lache!
Lärs do ane, frisch und frank
und i säg dir: Vilmol Dank!

De Samichlaus, de Samichlaus

De Samichlaus, de Samichlaus,
so tönts vo Huus zu Huus.
Gar mängem Chind chlopft s’Herz so fest
und luegt zum Fenster uus.

Jetzt polderets dur d’Stege-n-uuf,
was hed er ächt im Sinn?
Er treit en Sack so schwer und grooss,
was tuusigs isch da drin?

De Sack de nimmt er immer mit
für d’Chinde grooss und chlii.
De braave leert er d’Nusse druus,
die böse steckt er drii.

De Samichlaus chunnt z laufe

De Samichlaus chunnt z laufe,
Durab gäg eusem Huus,
Tüend artig, mini Chinde,
Er packt dänn vilicht us.

Er hät im Sack vil Nusse
Und Guetzli au derbi,
Tüend artig, mini Chinde,
Susch gaht de Chlaus verbi.

Säg Samichlaus, ischs würkli wohr

Säg Samichlaus, ischs würkli wohr,
muesch du die meischti Zit vom Johr
im Wald usse Ruete binde,
für unfolgsami Chinde?

Für Chinde wo tüend umestoh
Wenn’s schnell sötti go Poschte go
Wo mängsmol gar tüend trutze
Und nie rächt s Näsli putze?

Ein Brüderli nüt z spiele gänd,
wo d Wand verschmieret mit de Händ,
d Spielsache nid ufruume
und s Mueti so versuume?

Jo, Samichlaus, i gib-es zue,
au i hät dörfe netter tue,
doch will i jetzt dra dänke;
tuesch mir glich öppis schenke?

I danke gwüss vo Härze froh,
hoff, s nöchscht Johr werdisch wieder cho
bis denn bin-i e Guete,
bruchsch sicher nümme e Ruete!

Samichlaus, du liebe Maa (2)

Samichlaus du liebe Maa,
gäll du wotsch es Sprüchli ha.
Samichlaus ich säg dir eis,
Ich weiss e keiss.

chinderliedli.ch bietet Eltern und Kindern Liedertexte, Melodien, Videos, Buch- und CD-Tipps zum Mitsingen. Zusätzlich informiert chinderliedli.ch in diesem Zusammenhang über Veranstaltungen und Kurse.

www.spielmeer.ch