De Tuusigfüessler Balthasar

De Tuusigfüessler Balthasar mit sine tuusig Füesse
Het letschthin uf die andri Schtroosesyte übre müesse.
Er wartet brav ufs grüene Liecht, doch het er sini Not:
Die vordere Bei händ grüen, doch alli hindere händ scho rot.
Himmeltonnertoria, ich cha die doch nid dääne loh.

Himmeltonnertoria, trippel trappel trippel, tibi dibi
Trippel trappel trippel, tibi dibi
Trippel trappel trippel,
Tipp tapp.

De Tuusigfüessler Balthasar isch würklich nümm zum Lache,
Er sötti nämlich siebe Wuche Militärdienscht mache.
Marschiere schön in Reih und Glied isch schwiirig vorderhand,
Dr Balthasar het mit de Füess es böses Durenand.
Himmeltonnertoria, jetzt fangt au no dr Passgang a.

Himmeltonnertoria, trippel trappel trippel, tibi dibi
Trippel trappel trippel, tibi dibi
Trippel trappel trippel,
Tipp tapp.

De Tuusigfüessler Balthasar mues wyti Stregge laufe
Drum wott er sich im nögschte Laade Wanderschueh go chaufe.
D’Verkäuferin, die bringt es Paar und stellt’s ihm vorne hi.
Dr Balthasar seit: Jemmers Troscht, das längt jo niene hi.
Himmeltonnertoria, ich muess dr ganzi Lade ha.

Himmeltonnertoria, trippel trappel trippel, tibi dibi
Trippel trappel trippel, tibi dibi
Trippel trappel trippel,
Tipp tapp.

(Dieter Wiesmann)
Die CD „Matthias“ kann hier bestellt werden. Zudem ist das Lied auch auf „Die grössten Schweizer Hits – Chinderlieder“ zu finden.